A Kilawm Huna Kampauna
A Kilawm Huna Kampauna
“A kilawm huna kammal khat paukhiatna in ngunpeek tung a kham tang khat a kisuang tawh kibang hi” (Pau. 25:11)

A Kilawm Huna Kampauna

Mipil taktakte in thu a gen uh ciangin a hun leh a mun enkawmsain pilvang takin gen se uh hi. Saupi zong gen detdat se lo uh a, tomkim takin gen uh hi. Tua hang mahin paukhial cih bang nei ngei lo pah uh a, a thugen un zong mite lungsim sukha deuhin, muibun deuhse hi.

US gamah tualgal (civil war) a omlaiin gal hanginmite dipkua, patau-in a om hun laitakin Fanny J.Crosby (1820- 1915) in ?Safe in the arm of Jesus? (Jesu ang muanhuai sungah) cih la ngaih mahmah khat hong phuak a, gal kidona sungah tua la hong sak kawikawi ciangin mite in Jesu sungah lungmuanna thak hong ngah uh hi.

Winston Churchill (1874-1956) a neu laiin lai pil lo lua ahih manin sang panin kihawlkhia hi. Amah England Prime Minister a suah ciangin tua sangte Diamond Jubilee ah thugen dingin kisam hi. Amah zong pulpit tung kahto a, “Never give up” (Lungkia ngei kei in) cih kammal thumvei gen ziau hi. Hih kammal pen tom mahmah napi, minthang hi.

Galpi nihna laiinGermany Nazite in Norway gam la khin uh cih thu England makaite in a zak uh ciangin patau mahmah uh hi. Tua hun laitakin Winston Churchill in, ?Mualah i kituah leh mualah do-in, guamah i kituah leh zong guamah i do ding a, amaute i zo thal gawp ding hi? ciin a mite hanthawn a, lai tawh hawmkhia hi. Tua kammal in a patau makaite leh galkapte hangsansak tuam a, German Nazite zawhna-in hong neihlawh uh hi.

Galpi nihna laiin Philippines tuikulhah US galkapmangpa Gen. Douglas Mac Arthur (1880-1964) a om sungin Japante in tua tuikulh sim uh hi. Amah US a ciah nading thu tung lian a, a ciah ding ciangin tua tuikulh a om mite kiangah, “Kei hong pai kik ding hi ing” ciin vaikhak hi.Tua kammal pen Japante kihta-in a omtua tuikulh sunga a teeng mite adingin thaza hoih khat hong suak a, hangsan sak tuam hi. Thangah takin Japante a sim uh teh hong zo pah lian uh hi.

US gam New Yorkah Teen Challenge Ministry phuanpa David Wilkerson (1932-2011) in lamdawi (Road devil) bupa Nicky Cruz kiangah Jesu hong itna thu va gen hi. Nicky in temkun tawh thah dingin a vau ciangin David Wilkerson in a awm dawh a, Nicky aw, hong that inla, ka sare atnen in. Tua hi leh ka sa themno khat nangawnin, “Nicky aw, hong it ing hong ci lai ding hi” ciin gen hi. Itna a lunggulh Nicky Cruz in tua kammal a zak ciangin a lungtang lawng a, pianthak lawh hi.

1977 February kha sungin Lt. Col. ZamKhan Thang (Rtd) Yangonah Party khawmpi a kah kimlai hong si dihdih a, a luang pen Tedimah hong kipua hi. Amah pen milian khat ahih manin Zomi bup kilinglawng zo phial hi. Ni khat Rev. Hau Lian Kham in misi innah “Sihna tungah gualzawhna” thulu gen a, “Hih bang hunin Honpa i kisam” cih solo zong sa hi. Siapa pen Topa? mizat khat ahih banah, mite lungsim a neu hun laitak ahih manin a thugen leh a la sakte in mite lungsim sukha mahmah a, milian pawlkhat bang in pianthak lawh lian uh hi. Siapa in a hun leh a mun enin thugenin, la sa ahih manin lawhcing hi.

2008 kum US President kitel laiin Barack Obama in a mee (vote) zonnaah “Change” (kikheelna) cih bulphuh hi. Tua pen a lui a cimtak, a thak pongpong a lam naih khangnote in diksa uh ahih manin mee pia pah ngeingai uh a, tua tawh Obama in US President hong ngah hi. 2012 kum kiteel ciangin “Move Forward” (Mailam nawt) cih hong bulphuh leuleu a, tua tawh President hong ngah leuleu hi. A hun tawh kizuiin thubulphuh nei thei ahih manin tua tawh mite lungsim zo mahmah hi.

2008 kumMay kha sungin Irrawaddy Division sung tengah Nargis huihpi hangin a si, a mang tampi om ahih manin mi khempeuh dipkua, patauin om uh hi. Tua pen Pasian nasempawlkhat in hun hoihin zatsiam uh a, Lungdamna thu a gen uh leh lawhcing mahmah uh hi. Hihpen tuhun pau-in khapilna khat hi gige hi.

Ni dangin Co-operative zum-a a sem Phaileng khua mi Pa Zen Khan Cin in Party Regional Committee Chairman Pu E. K KimNgin kiangah Matupi pan Tedimah a piang (transfer) sak nadingin va ngen hi. Pa Cin in, “Pu aw, nang pen Zogam kumpi na hih manin nang, hi hen” na cihte ahi hi pah lel hi. “Nang, Pasian simloh kua dong nawn ding na hiam” ci hi.Tua kammal in Pu E. K. KimNgin lungkimsakmahmah ahihmanin tua nimahin Tedim transfer theih nading vaihawmsak pah hi. Pa Cin pen a hai tawh a kibat hang, a taktakin a pil khat na hi gige hi.

Pasian nasem pilvangte inn thunget a pai uh ciangin innteekte thupulakna lim takin ngai uh a, tua tungtawnin hanthotna pia se uh hi. Tua pen a hun tawh kizui ahih manin muibun deuh a, zong tha kingah deuh se hi.Apilvang lote in bel innteekte in bang teng pulak uh cih khawng ngai se lo uh a, inn pan amau kiginsa khatpeuh gen ziau thei uh hi. Tua dan pen tha kingah lo zaw den hi.

Mihingte pen i vaang a bei kuan, i hun a bei kuan teh kipaukhial nuam deuh, ciiin kigen hi. KawlgamkumpiU Ne Win pen kampau siamin a kigen khat hi napi, July23, 1988 ni-in Party khawmpiah, “Party khat tawh khangto lo i hih leh party tuamtuam (multi-party) tawh kalsuan ding i ut hiam?” hong ci kha laizang hi. Tua ama kammal tungtawnin Kawlgam hong kilumlet a, ama hun a bei hong hiziau hi.

Laitai ( G.S Pau, Tedim )

What's your reaction?

Comments

https://siantongluan.net/assets/images/user-avatar-s.jpg

0 comment

Write the first comment for this!