Ballpen A Bawlcil Pa
Ballpen A Bawlcil Pa
Leitungah hong piangkhia masa pen bawlpen leh a bawlpa thu a simnuamte a dingin anuai-ah kisimthei hi...

Ballpen A Bawlcil Pa

Mihingte in i ciaptehnop i gelhnop leh mi i theihsak nop thute i gelh nangin tu hun ciangin Ballpen kizang hi. Tua ahih manin Ballpen thu theih huai hi.

Laigeihna a kizang mahmah Ballpen a bawlcil pa min pen Letszalo Joseph Biro ahi hi. Letzalo pen 1889 kum september 29 ni-in Hangeri gam Budapet khua-ah suak a, Hangeri mi hipah hi. Zetszalo in a vanbawl teng khempeuh lakah Ballpen a bawlna hangin minthan lawh pen a, mite theihlawhna pi peh hi. Amah in FORDAC Companyte a ding Automatic Gearbox alim gelin, a van bawl pah a, tua company mahah a zuak pah hi.

Ahih hangin Letszalo pen a Upa George tawh sumbawlna a haksatna hangin a nasep uh zom zolo uh hi.

Baalpen bawlna: Letszalo pen siavuan sintheih nang letmat anei hi napi in siavuan sin suak lo hi. Kum zalom sawm nih hun a masa lamin Newspaper leh Magazine bawlna munah nasem khat in om hi. a nasepna zumah tua hun lai in phongding tui ( fountain ink ) kizang lai hi. A phongding tui uh pen keu baih mahmah a laidal tunga a bangkhate na ngawn kisumit manlo in keu pahpah a, a buahbangsa in omden a, siangtho zolo hi.

Hih banga phongding tui tawh a buahbangsa-a a omloh nangin nakpi in ngaihsunin phongding tui aha ( tuisik lo zawdeuh ) deuh dingin ngaihsutna a nei hi. Phongding tui aha a ngahtheih na dingin datlam ( chemistry ) kisam in, a upa George in na hih thei hi. Amau unau in baalpen tui hoihtakin bawlthei ta uh ahih manin 1931 kum Hangeri gamsung Budapet khua-ah gambup vanthak lahna munah ballpen tui thak lakthei uh a, tua pan kumpi ciaptehna leh theihpihna zong ngah uh hi.

Ballpen muk bawlthei ta: Letszalo leh a upa George in ballpen tuinam athak bawlthei ta uh a phongding ahate phongding sungah athun uh ciang, amuk pan phongding tui atui siangte bangin a luang kiphamawh lo a, awk ( kawl ) leklek hi. Letszalo pen a upa George mah tawh kikumkik uh a, ballpen mukah suankang sik nam ( metal ) balltang banga a bem bawlin a thuah uh leh phongding tui kidangsam loin ( khawl nawnlo in ) luangsuak thei ta hi. Tua-a kipan ballpen hoih mahmah a namthakte a bawlthei ahi hi.

England Vanleng hawlte’n zong deih: Letszalo in ballpen namthak a bawl pen Japan gal ( Word War II ) lai pawlin bawl ziahziah ta a, thaman sang ziahziah ta hi. England khuapi a cing vanleng galkapte in vankimlai pan a phongding tui uh phulin bua theizel a, puan ninsak hi. Letszalo te bawl ballpen thak a zat uh ciangin atui phullo ahih manin kideih zaw pah a, kikhawng zaw hi. Tua ahih manin England khuapi a cing vanleng galkapte zat ballpen in min nei zawin kideih zaw pah hi.

Ballpen kibawl ziahziah ta: Japan gal ciang Letszalo leh George te unau gal lauin atai uh leh, 1943 kumin America gam Argentina tung uh a, 1943 kum June 10 in USA kumpi ciaptehna ngah hi. 1950 kum ciang Marshall Titchi in Letszalo khut tung pan ballpen bawltheihna, anei hihna lei uh a, a nung ciang BIC company pan BIC ballpen ci-in bawl ziahziah uh hi.

Letszalo site: Letszalo pen 1985 kum October 24 ni-in a omna Argentina gam Buenos Aires khuapi-ah si hi. Argentina kumpi in Letszalo phawk tawntungna in pahtawina pia uh a, ama pian ni September 24 ni simin pahtawina pia den uh hi.

Lai-at – Peter Zam Sian Mung Shoute (Laibu – Siamsin Magazine)

What's your reaction?

Comments

https://siantongluan.net/assets/images/user-avatar-s.jpg

0 comment

Write the first comment for this!