Na pallai ni Zatsiam in

Na pallai ni Zatsiam in

Hih paak pen ka etet ciangin tui kilkel in hoih in etlawm kasa mahmah hi. Tulai takin hih paakin ama a dingin ahoih pen, a etlawm pen leh a kizattheih, a manphat pen hun hi kha ding hi. Banghang hiam? cih leh tulaitak a palhkhiat laitak, ahoih pen laitak ahih mah bangin mihingte in zong deih in, lunggulh in, hoihsa in biakinn, pawi cih bang mun tuamtuamte-ah zepna, etlawm sakna in na zangnuam ding uh ahih manin ama a dingin ahoih pen leh a manphat pen hun ahi hi.

Ahih hangin nikhat ni ciangin ahing kilkel ahoih, a etlawmnate pen hong bei ding a apaak hong kuai-in, hong vul ding a ahoihna leh a etlawmnate in manphatna a neihnawtloh hun hong tung ding hi. Tuani ciangin mihingte’n zong hoih a saknate uh hong bei ta ding a, a kizattheih nawtloh manphatna a neihnawtloh hun hong tun ciangin ama a dingin a nuntakna a beihun hong tung tawh hong kibang ding a, a nuntakna in a manphatna hong om nawnlo ding hi.

Tuamah bangin ei leitung mihingte nuntakna sung i et ciangin zong hih paak mah tawh i kibang hi. Hih paak bangin i palhkhiat laitak pen ei a dingin a manphat mahmah laitak hong hi-in paak bangin i kuai, i hul khit ciangin i nuntakna in bangmah a manphatna om nawnlo hi.

Tua ahih manin i khangno hun, paak bangin i etlawm, i palhkhiat hunsung teng pen i zatsiam ding kisam mahmah hi. I sepnop i bawlnop bangbang pen lungsim suakta takin i sep theih, i bawltheih ding kisam mahmah hi. Ahih hangin i sep khiat i bawlkhiatnate pan ahoih leh ahoih lo i khentheih ding kisam hi. Gentehna in "mihing khat kihtakna in a hoihlo i sep khak ding duhluat, deihluat manin a kilawm a kituak lo i sep khak, i bawlkhak ding" cih bang a tuamtuamte i kidawp theih ding kisam hi. hih pen ei’a dingin sep theih, ngah theihna hi ta leh i lungsim khat suakta ngeilo ding ahih manin a hoihlo nate khempeuh i sep khiat, i bawlkhiat ma-in i theltheih ding kisam hi.

Banghang hiam cih leh leitung mihingte nuntakna in nikhat khit nikhat, kumkhat khit kumkhat i nuntaknate hong kilamdang toto a nikhat ni ciangin paak mah bangin i kuai, i hul ni hong tung ding a tuani ciangin sen leh kik thei leng maw mualliamsa hunluite lakik nuam veng ci-in i ngaihsun kik kha ding hi. Tua bang a i ngaihsut khak ciangin i senlai nite lungkimtak a mualliamsak i hihna ding leh paak bangin vul in lungkimtak a i pulhkhiat thei ding kisam kasa hi.

Paak bang a lungkim takin i pulhkhiat ni ciangin hih a hoihlo nate khempeuh in tawntung nuntakna-ah kipua theilo in manphatna zong neilo hi. Ahoih i sep khiatnate in ei’a dingin a manpha mahmah a kilei theilo kham lukhu ahi hi.