Kalemyo Agape Ministry Centre a om Pa Thawng Lian Kam in kum 1990 in Josh.24:15 sung siksanin innkuan a Pasian nasep ding sapna ngah hi. A tate Pasian thu tawh pattahin “Family Gospel” ci-in min phuak hi. Family Gospel Teamte min hih bang hi.

1. Evan. Thawng Lian Kam (pa pen)
2. Kim Za Khup (nu pen)
3. Lia Niang Lian Lun (Lunsen)
4. Lia Niang San Kim (Kimpi)
5. Tg. Cin Van Kim (Kimpu)
6. Lia Cing Sen Sang (Sangi)
7. Lia Vung Tawi Lian (Tawinu)
8. Tg. Kap Thuam Lal (Lalthuam)
9. Lia Cing San Lian (Sanlian)
10. Lia Pau Sian Hoih Vung (Sianhoih)

Pasian thu a thei nai lote kiangah Lungdamna thu puak ding leh Topa phat dingin kipia uh hi. Tua bangin khual zin kawikawi-in Kawlgam sung mun tuamtuam leh khua neu khuata a phak khit uh ciangin Mizoram, Manipur leh India mun tuamtuamah zong pai uh hi. Sia Thawng Lian Kam in la 30 val phuak khin zo a, tua a la phuahte leh midang phuahte sa-in zin kawikawi uh hi. Lakhui (Album) zong thum bawl zo uh hi.

1995 – Hallelujah Vol. 1. “Naupangte Zeisu’n it hi.”
1999 – Hallelujah Vol. 2, “Kei leh ka innkuanpihte’n Topa na ka sem ding uh hi.”
2003 – Hallelujah Vol. 3, “Topa’n hong tonpih hi.”

Hih khuite pen copy 2500 ciat hawm khia uh hi. A nasepna uh panin mite in tha ngahin, kikhelin, damna nagawn a ngah om hi. Pasian thu a za nai lote in a zak theihna ding leh Gospel Lungdamna thu tangko ding a tup pen uh ahi hi.

Pasian in kisam a sakna peuhpeuhah leitung bupah Pasian ading teci pangin lungdamna thu gen kawikawi dingin a kipiakhia uh ahi hi. Tu laitakin Kimpi leh Sangi in Evangelical College of Theology, Lamka-ah Lai Siangtho a sin laitak uh hi a, Lamka-ah a om uh hi. ECT Trio ci-in Lia Muanting, Kimpi, Sangi in lakhui bawlin pau tuamtuam Thahdo, Hmar, Lusei, Paite, Tedim, Vaiphei, Meitei, English etc. pau tawh lasa-in mopawi leh khoppi khat peuhpeuhah kisam kawikawi hi.