Kansau khua Pa Vung Thang leh Nu Do Zen Cing tapa giat lak panin a nga-na Sia Langh Do Khup pen 24.12.1968 ni-in piang hi. Unau pasal 7 sung panin a nga-na hi a, tua sung panin 4 in Pasian nasem uh hi. A sanggamte Rev. Cin Za Mung, C.Th., Pastor Kham Kap Lian, B.Th., Sia Kham Sian Pau, B.Th., B.D., M.Div., M.Th. ahi uh hi. 5.1.1996 ni-in Lia Cing Suan Niang tawh kitengin Rev. Go Khen Thang in lethat hi. Tu-in tapa 3 leh tanu 2 nei uh hi. Khitui Gospel Team ci-in nasepna nei-in Kalemyo-ah Pasian nasemin a innkuanun a om uh hi.

Pilna lam: A neu tungin sangkah napi-in leitung vai lam kin zaw ahih manin Tan 8 ciang simin a ban a zom nawn kei hi. Ahi zongin a pianthak (9.8.1990) akipanin Pasian nasemin nakpi takin kizang a, khangnote sungah a kizang mahmah khat ahi hi. Pasian nasepna leh a lai gelhte hangin Bethel Bible College in 2004 kumin B.Th. degree pia hi.

La lam nasepna: Amah pen lasak lam leh la phuak lamah hun bitin a sep loh hangin a la phuakte leh a laigelhte hoih kisa mahmahin Pasian in zang mahmah hi. La dawng tampi mah phuakin, a pianthak ma-in Zawlla tampi na phuak ngei hi. A pianthak ciangin gamngaih la, biakna la, Zola cih bang tampi mah phuak hi. A laphuakte hoih kisa-in kideih mahmah a, 1990 khit cianga Tualsuak La sungah a kideih pawl ahi hi. “Itna sisan luangin” cih bang pen tu dongin sumpi don’na la dingin kizang a, “Lamdang lua aw, lamdang lua sa’ng” cih pen khangnote lainatna la dingin kizangin nu leh pate in deih mahmah hi. “En ve’n ka te’n nang gam nuam” cih zong tunglam ngaihsutna la hi a, kideih mahmah hi.

1991 kumin “Nuntak kikna” kici khui 200 hawm khia a, 1996 kumin “Khitui Gospel Lainatna Aw” kici khui 2000 hawmkhia leuleu hi.

La phuak bek hi loin Zomi sungah Video khui a kideih mahmah “Ngaih Anglai-ah kici pen 2003 kumin Japan a om Zomite tawh a thoh khiat ahi hi. 2005 leh 2006 kumin Ngaih Anglai-ah 2-na leh 3-na thoh leuleu hi.

Tham loin lailam zong hih thei mahmah hi. “Hauhna leh Khansauna Thusim” kici laibu 2000 kumin gelh a, 2007 kumin a nihveina kikhen leuleu hi. Hih laibu pen 2007 kum akipan Manipur University in B.A. III yr. ah Paite Vernacular a zat dingin kipsak hi.

Evan. Langh Do Khup pen na khat peuhpeuh a hihna-ah citak leh kuhkal ahih manin la phuak thei, lai gelh thei, thugen thei-in talent nei hoih mahmah khat ahi hi.

(a) Zinmang laal hang ka nawh ni’n ee, tuizum lenmual kal ing ee.
(b) Zinlai hen teng ka sutna aw, Sianmang namtem hiam sang ee.

(Hih thu pen Jan 29,2008 ni-a ama tangthu gelhna sung pan kikaihkawhm hi a, a la phuakte hoih kisa ahih manin lasiamte lakah kihel ahi hi.)