Moses in Israel mihonpi khempeuh khawmin amaute kiangah, “Hihte pen note’ hih ding Topa’ hong thupiak ahi hi. Ni guk sungin nasep kiman ding a, ahih hangin a ni sagih ni-in thupi-a tawlngakna Sabbath siangtho Topa’ tungah na nei ding uh hi. Tua ni-in na khat peuhpeuh a sem peuhmah kithat ding hi. Sabbath ni-in na tenna khempeuh uhah mei na cih kei ding uh hi,” a ci hi. Moses in Israel mihonpite khempeuh tungah, “ Topa’ hong thupiak hih bang ahi hi: Note in Topa’ tungah biakna na pia ding uh hi. A pia nuam peuhmah in Topa’ tungah biakna paipih un. Tuate in: Kham, ngun le sumngo, a dum, a dupsan, a ausan khaute le a kopin a kikhuk puan hoihte, keelmul, a kisansak tuutal vunte le savunte; singkha sing, meivak a’ ding sathau, nilh sathau le a paknamtui dingin a namtui nate, siampipuan le awmdalah bulh dingin onik suang le suang dangte ahi hi. “Note’ lak panin siamna a nei mi peuhmah hong paisak unla, Topa’ thupiaksa khempeuh bawlsak un. Tua a bawl dingte pen biakbuk, a puanbuk le a khuhna, a vankhainate le a khuampeekte, a zawlte, a khuampite, a bullente; singkuang a zawlte tawh, hehpihna tokhom le kongkhak dalna puan; sabuai a zawlte le a nazatte khempeuh tawh, Ompihna Anlum; khuavak dingin meivakkhuam zong, a nazatte le a meivakte tawh, meivak dingin sathau; paknamtui biakna tau, a zawlte tawh, nilh sathau le a namtui paknamtui le biakbuk kongah kongkhak a’ ding puankhai; meihal biakna tau, a sumngo siklen, a zawlte, a nazatte khempeuh, kuang le a ngakna tawh; buktual a a puankhaite, a khuampite le a bullente tawh, tual kongpi a’ ding puankhai; biakbuk khetphimte le huang khetphimte, le a khaute; siangtho munah zat dingin limtakin a kigan puante, amau’ siampi nasep nadingin siampi Aaron a’ ding puan siangtho le ama tapate’ puante ahi hi,” a ci hi. Tua ciangin Israel mihonpi khempeuh Moses’ omna panin paikhia uh hi. Piak nopna lungsim a nei mi peuhmah hong pai tawm uh a, kikhopna buk le a nasep nading khempeuh le puan siangthote a zat dingin Topa a’ ding a piakte uh hong puak uh hi. Tua ahih ciangin numei, pasal hong pai uh hi. Piak nopna lungsim a neite khempeuh in tukkilhte, bilbahte, min gelhna zungbuhte, le banbulhte ahi kham tawh a kibawl na namkim hong paipih uh a, a milip in Topa’ tungah kham tawh piakna ap uh hi. A dum, a dupsan, a ausan khaute, puan hoih, keelmul, a kisansak tuutal vunte, ahih kei leh savun hoihte ahi zongin a nei mi peuhmah in tuate hong paipih uh hi. Ngun ahi a, sumngo ahi zongin a pia thei peuhmah in Topa’ tungah tua nate paipih uh a, nasep nadinga kimang thei ding singkha sing a nei mi peuhmah in zong hong paipih hi. A hih thei numei khempeuh in a khut uh tawh khau khuk uh a, amau’ khuksa a dum, a dupsan, a ausan khaute le a kopin a kikhuk khaute hong paipih uh hi. Hih theih siamna a nei numei khempeuh in zong keelmul khuk uh hi. Makaite in siampipuan le awmdal a bulh dingin onik suang le suang dangte, meivak ding, nilh sathau ding, le paknamtui dingin a namtui nate le sathau hong paipih uh hi. Topa in Moses tunga a thupiaksa nasep nadingin na khat peuhpeuh a pia nuam numei pasal Israel mi khempeuh in utthu-a biakna-in Topa’ tungah hong paipih uh hi. Moses in Israel mite kiangah, “Thei un; Topa in a minin Judah minam, Hur’ tapa Uri, Uri’ tapa Bezalel sam khin hi. Lim hoihte a geel ding; kham, ngun, sumngo tawh na a bawl ding; siamna nam khempeuh nasep nading, bulh ding suang seekna, le singzep nasep a sem dingin amah in vangliatna, siamna, pilna, theihna, le khutsiam nasep khempeuh tawh amah kidimsak hi. Topa in amah le Dan minam Ahisamak’ tapa Oholiab tungah midangte hilh siamna pia khin hi. Amah in khutsiam nasep, geelsiam nasep; a dum, a dupsan, a ausan khaute le a kopin a kikhuk puanzep siam nasep; siamgat siamna, le geelsiam nasep ahi zongin nasep namkim a sem dingin amaute tungah siamna a guan hi.