Egypt-ah an a omna thu Jakob in a theih ciangin a tate kiangah, “Bang hangin khatlekhat ki-enen mawk na hi uh hiam? Egypt-ah an om hi, ci-in ka za hi. Eite si loin i nuntak nadingin paisuk unla, ei a’ ding an va lei un,” a ci hi. Tua ahih ciangin Egypt-ah an lei dingin Josef’ sanggamte sawm paisuk uh hi. Ahih hangin Jakob in Josef’ sanggampa Benjamin, a sanggamte tawh paisak lo hi. Bang hang hiam cih leh ama tungah siatna tung kha ding, ci-in lau hi. Kanaan gam sungah kial tung ahih manin a hong pai dangte tawh Israel’ tapate an lei dingin hong paikhawm uh hi. Tu-in Josef pen tua gam a ukpa hi a, gammi khempeuh tungah an a zuakpa amah ahi hi. Josef’ sanggamte hong pai-in, a maitang uh leilam ngatin ama mai-ah hong kun uh hi. Josef in a sanggamte a muh ciangin thei a, ahih hangin amah in midang bangin bawlin amaute tungah khauh pau hi. “Koi pana hong pai na hi uh hiam?” a ci hi. Amaute in, “An lei dingin Kanaan gam panin hong pai hi ung,” ci uh hi. Josef in a sanggamte thei a, ahih hangin a sanggamte in amah thei lo uh hi. Josef in a mangin amaute a mat khitna a phawk hi. Amah in amaute kiangah, “Note, thukan na hi uh a, hih gam thaneemna a en dingin hong pai na hi uh hi,” a ci hi. Amaute in Josef kiangah, “Hi lo hi, topa aw; an lei dingin na nasemte a hong pai hi ung. Kote khempeuh mi khat’ ta ka hi uh hi. Kote, a thutak ka hi uh a, na nasemte thukan hi lo uh hi,” a ci uh hi. Amah in amaute kiangah, “Hi lo hi, hih gam ginat lohna a en dingin hong pai na hi uh hi,” a ci hi. Amaute in, “Ko, nangma nasemte, sanggam pasal sawm le nih ka hi uh a, Kanaan gam sungah mi khat’ ta ka hi uh hi. A moi pen tu laitakin ka pa uh tawh om a, khat pen om nawn lo hi,” a ci uh hi. Ahih hangin Josef in amaute kiangah, “Note’ tunga kong gen bangin a man mah ahi hi. Note, thukan na hi uh hi. Hih thu tawh note hong kithei ding hi: Faro a nungta ahih mah bangin na sanggam moi pen uh hih lai-ah hong pai kei leh hih lai mun panin note na paikhia thei nawn kei ding uh hi. Note’ sungah thuman om hiam, ci-in a kimuh nading, na thugente uh a kitel nadingin note thong sungah na om laitakun note khat kisawl unla, na sanggampa uh hong paipihsak un. Tua ahih kei leh Faro a nungta ahih mah bangin note, thukan na hi taktak uh hi,” a ci hi. Amah in thong sungah ni thum sung amaute a koih hi. A ni thum ni-in Josef in amaute kiangah, “Keimah in Pasian zahtak ka hih manin hih bangin gamta un. Tua hileh na nungta ding uh hi. Note, thuman mi na hih uhleh thong sungah na sanggamte uh khat omsak lai unla, a dangte pai-in na innkuan uh a gilkialte a dingin an pua unla, na sanggam moi pen uh kei kiangah hong paipih un. Tua ciangin na kam gente uh kitel ding a, note na si kei ding uh hi,” a ci hi. Amaute tua bangmahin gamta uh hi. Tua ciangin amaute khatlekhat in, “A taktakin i sanggampa tawh kisai-in eite i mawh hi. Amah in eite kiangah hong thum napi-in eite in a thu i ngaih loh ciangin amah a lungkhamna i mu hi. Tua thu hangin hih bang lungkhamna eite tungah hong tung hi,” kici uh hi. Reuben in amaute dawng a, “Tangvalpa tungah khial kei un, ci-in note tungah hong gen hi lo ka hi hiam? Ahih hangin ka thu nong mang kei uh hi. Tua ahih ciangin tu-in ama sihna thaman eite’ tungah hong tung ahi hi,” a ci hi. Amaute’ kikalah kamphen khat om ahih manin Josef in amau’ paute a tellam amaute in thei lo uh hi. Tua ciangin amaute’ kiang panin Josef kihei-in a kap sim hi. Tua ciangin amaute kiangah hong paikikin amaute hopih hi. Amah in amau’ kiang panin Simeon la-in amau’ muhna-ah amah a hen hi. Amau’ ipte antang tawh dipsakin, a van sung uhah amau’ sum ciat koih kikin, lampi-a a nek ding uh an a piak nading Josef in thu a pia hi. Tua bangmahin amau a dingin kihihsak hi. Tua ciangin amaute in a late uh antang suanin a paikhia uh hi. Amaute khat in a giahna panun a la gan-an pia dingin a van a suah le, a van gongah a sum mu hi. Amah in a sanggamte kiangah, “Ka sum kikoih kik hi. Hih lai-ah ka van gongah na om!” a ci hi. Hih thu hangin amaute lungsi uh a, lingin amaute khatlekhat ki-en uh a, “Pasian in eite hih bangin hong bawl a bangci thu ahi hiam?” a ci uh hi. Kanaan gamah a pa uh Jakob kiang a tun uh ciangin, amaute’ tunga thupiang khempeuh gen uh a, “Mipa, tua gam topa kote’ tungah hong khauh pau-in, tua gam thukanin kote hong ngaihsun hi. Ahih hangin kote in ama kiangah, ‘Kote thuman mi ka hi uh a, kote thukan ka hi kei uh hi. Kote pen ka pa uh’ tapa, sanggam pasal sawm le nih ka hi uh hi. Khat pen om nawn lo a, tu laitakin a moipen Kanaan gamah ka pa uh tawh om hi,’ ka ci uh hi. Tua ciangin tua gam topa in kote kiangah, ‘Note thuman mi na hihna uh hih tawh ka thei ding hi: Na sanggamte uh khat kei kiangah nusia unla, na innkuan gilkialte a dingin antang la unla, ciahkik un. Na sanggam moi pen uh kei kiangah hong paipih un. Tua hileh note thukan hi loin thuman mi na hihna uh ka thei ding a, note kiangah na sanggampa uh hong khahin, hih gam sungah omin na na sem thei ding uh hi,’ hong ci hi,” ci-in a gen uh hi. Amau’ vante a suah ciangun, a milipun a sumte uh a van sung ciat uhah na om hi. Amaute le a pa un amaute’ sum kihente a muh uh ciangin, lungkham uh hi. A pa uh Jakob in amaute kiangah, “Ka tate tawh kei nong kikhensak zo uh hi: Josef om nawn lo, Simeon om nawn lo, tu-in note in Benjamin na la ding uh hi. Hihte khempeuh kei’ tungah hong tung khin hi,” a ci hi. Tua ciangin Reuben in a pa kiangah, “Na kiangah amah kong paipih kik kei leh ka tapa nihte that in. Kei hong ap in, nang kiangah amah kong ciahpih kik ding hi,” a ci hi. Ahih hangin amah in, “A sanggampa si a, amah bek om ahih manin ka tapa in note hong zuisuk lo ding hi. Note’ pai nading na khualzinna uhah ama tungah siatna tung kha zenzen le, khangham khit nungin dahlua-in ka si ding hi,” a ci hi.