Topa in Moses kiangah, “Israel mite kiangah hih bangin gen in: Israel mite khat peuhpeuh hitaleh Israel sunga a peem khualmite hitaleh, a tate khat peuhpeuh Molek pasian tungah a pia mipa kithat ding a, mihonte in suang tawh denglum ding uh hi. Kei mahmah in tua mipa ka maisiat ding a, ama mite lak panin ka hawlkhia ding hi; bang hang hiam cih leh amah in a tate Molek tungah pia-in, ka biakbuk ninsakin, ka min siangtho daisak hi. Amah in Molek tungah a tate khat a piak ciangin mihonte in tua pa kimuhmawh bawlin amah a thah kei uhleh, keimah in tua mipa le ama innkuanpihte maisiatin, amah le Molek biakna-ah amah a zuite khempeuh amau’ mite lak panin ka hawlkhia ding hi. “Mi khat vankahna le aisan lamah kihei-in tuate thu a dot leh, keimah in tua mipa ka maisiat ding a, ama mite lak panin amah ka hawlkhia ding hi. Tua ahih ciangin note ki-ap unla siangtho un; bang hang hiam cih leh kei pen Topa na Pasian uh ka hi hi. Ka thukhamte zui unla, tuate sem un; note a hong siangthosak Topa pen keimah ka hi hi. “Bang hang hiam cih leh a nu ahih kei leh a pa a samsia mi peuhmah kithat ding hi. Amah in a nu ahih kei leh a pa samsia khin a, ama sihna amahmah ngawh ding ahi hi. “Pasal khatpeuh a vengpa’ zi tawh a mawh leh, tua a khial pa le a khialnu kithat khawm ding hi. A pa’ zi tawh a lumkhawm mipa in a pa a mindaisak a suak hi. Amau tegel kithat ding hi. Amau’ sihna amau mah ngawh ding ahi hi. Pasal khat a monu tawh a lupkhop leh, amau tegel kithat ding hi; amaute in si kinailua mi tawh khialhna a bawl uh ahi hi. Amau’ sihna amau mah ngawh ding ahi hi. Pasal khat in numei khat tawh lupkhop bangin pasal dang khat tawh a lupkhop leh, amau tegel kihhuaina a gamta khin uh ahih manin amaute kithat ding a, amau’ sihna amau mah ngawh ding ahi hi. Pasal khat in zi nei-in, a zi’ nu tawh zong a lakthuah leh, tua pen a kilawm lo ahi hi. Note lakah tua bang kilawm lohna a om loh nadingin tua pa le a nutate, mei tawh kihallum ding hi. Pasal khatpeuh ganhing khat tawh a mawh leh amah le a ganhing kithat ding hi. Numei khat in ganhing khat naihin tua tawh a mawh leh, note in a numei le a ganhing na that ding uh hi; amau’ sihna amau mah ngawh ding ahi hi. “Pasal khat in ama sanggamnu, ahih kei leh a nu’ tanu tenpihin a lupkhawm uhleh, tua pen a zumhuai hi a, amau’ mipihte’ omna panin amaute kihawlkhia ding hi. Ama sanggamnu tawh mawh ahih manin tua pa in ama mawhna pua ding hi. Pasal khat, nin a nei numei khat tawh lumkhawmin a mawh uhleh, amau tegel in siantho nading ngeina palsat uh ahih manin amau’ mipihte lak panin kihawlkhia ding hi. “Note pen na nu’ sanggamnu ahih kei leh na pa’ sanggamnu tawh na mawh kei ding uh hi. Tua pen a nai behte tawh mawhna ahih manin amaute in amau’ mawhna pua ding uh hi. Pasal khat, a pa’ sanggampa’ zi tawh a lupkhop leh, amah in a pa’ sanggampa a mindaisak ahi hi. Amaute in amau’ khialhna thuak ding uh a, ta nei loin si ding uh hi. Pasal khat in a sanggampa’ zi a lak leh, tua pen nitna hi a, amah in a sanggampa a mindaisak ahi hi. Amaute in ta nei lo ding uh hi. “Tua ahih ciangin note in ka thukham khempeuh le ka biakna ngeina kipte khempeuh zui-in, tuate na sem ding uh hi. Tua pen note na ten nadingun kong paipih nading leitang in note hong luakkhiat loh nading ahi hi. Note’ mai-ah keimah in ka paihkhiat minamte’ ngeinate na zui kei ding uh hi. Amaute in hih nate khempeuh hih uh ahih manin amaute ka kih hi. Ahih hangin keimah in note kiangah, ‘Note in amau’ leitang na luah ding uh hi. Bawngnawi le khuaizu a luanna leitang, na neih dingun note tungah kong pia ding hi,’ kong ci khinzo hi. Kei pen mite’ kiang panin note a hong khenkhia Topa na Pasian uh ka hi hi. Tua ahih ciangin note in ganhing a siang leh a nin, vasa a siang leh a nin khentelna na bawl ding uh hi. Note in nin hi, ci-in na seh dingun keimah in ka tuam koihsa ganhing hitaleh vasa hitaleh leitung a a pai thei khat peuhpeuh tawh hitaleh, note na kininsak kei ding uh hi. Note pen keima a dingin na siangtho ding uh hi; bang hang hiam cih leh Topa ahi keimah ka siangtho a, note pen keima-a’ na hih theih nadingun mite kiang panin note kong tuamkoih zo hi. “Numei ahi a, pasal ahi zongin van a kah a, ai a saan leh kithat ding a, suang tawh amaute kidenglum ding hi. Amau’ sihna amau mah ngawh ding ahi hi,” a ci hi.