Tua ciangin Balaam in Balak kiangah, “Hih lai-ah kei a dingin biakna tau sagih hong bawlsak inla, kei a dingin bawngtal sagih le tuutal sagih hong pia in,” a ci hi. Balaam’ gen bangin Balak gamta a, Balak le Balaam in biakna tau simah bawngtal khat le tuutal khat ciat a pia uh hi. Balaam in Balak kiangah, “Na meihal biakna kiangah na ding in; kei ka va pai ding hi. Kei hong dawn dingin Topa hong pai kha ding hi. Amah in kei hong lah khempeuh nang kiangah kong gen ding hi,” a ci hi. Tua ciangin a sang mual dawn pawn khatah amah a paito hi. Pasian in Balaam na dawn hi. Balaam in ama kiangah, “Biakna tau sagih ka bawl khin a, biakna tau simah bawngtal khat le tuutal khat ciat ka pia hi,” a ci hi. Topa in Balaam kiangah thu gen a, “Balak kiangah ciahkikin hih bangin na gen ding hi,” a ci hi. Balak kiangah a ciahkik ciangin amah le Moab uliante khempeuh ama meihal biakna gei-ah na ding uh hi. Balaam in a thugen ding teng genin: “Aram panin Balak in kei hong paipih a, nisuahna mualte panin Moab kumpipa in kei hong paipih hi: ‘Hong pai in, Israel mite mawhsak in!’ hong ci hi. Pasian’ samsiat loh mite bangci samsiat ding ka hi hiam? Topa’ mawhsak loh mite bangci mawhsak ding ka hi hiam? Bang hang hiam cih leh mual dawn panin amaute ka mu a, mual neute panin amaute ka en hi. En in, a tangten’ mite, minamte lakah a kihel lote! Leivui zahin a tam Jakob mite, kua in a mal simzo ding a, Israel mi phazah a mal simzo ding ahi hiam? Mi thuman pa’ sihna bangin hong sisak inla, ka mailam thu ama a’ bang hisak in!” a ci hi. Tua ciangin Balak in Balaam kiangah, “Kei bang hong cih na hi hiam? Ka galte a samsia dingin nang kong sam a, ahi zongin amaute bangmah cih loin, amaute thupha na pia zawsop hi,” a ci hi. Amah in, “ Topa in ka gen dingin hong sawl thu, don lo ding ka hi hiam?” ci-in a dawng hi. Tua ciangin Balak in ama kiangah, “Amaute na muh theih nading mun dangah kei hong zui in. Amaute a madawk teng bek na mu ding a, a vekpi-in na mu kei ding hi. Tua ciangin tua lai panin amaute nong samsiatsak ding hi,” a ci hi. Tua ciangin amah in Zofim gamlak, Pisgah mual dawnah amah paipihin, biakna tau sagih bawl a, biakna tau simah bawngtal khat le tuutal khat ciat a pia hi. Balaam in Balak kiangah, “Hua lamah Topa tawh ka va kituah kalun na meihal biakna gei hih lai-ah na ding in,” a ci hi. Topa in Balaam na dawnin ama kiangah, “Balak kiangah ciahkikin hih bangin thu na gen ding hi” a ci hi. Balak kiangah a paikik ciangin a meihal biakna gei-ah amah na ding a, Moab uliante tawh na om uh hi. Balak in ama kiangah, “ Topa in bang hong gen ahi hiam?” a ci hi. Tua ciangin Balaam in a thugen ding teng genin: “Balak aw, ka thugen ding za in. Zippor’ tapa aw, ka thu ngai in: A zuau dingin Pasian pen mihing hi lo a, a kisik dingin mihing’ tapa hi lo hi. Amah in gen khin hi; a gen bangin hih lo ding ahi hiam? Amah in ci khin hi; a cih bangin tungsak lo ding ahi hiam? En in, thupha piak ding thu ka ngah hi. Amah in thupha pia khin a, ke’n ka kheelkik thei kei hi. Amah in Jakob mite tungah mawhna mu lo a, Israel mite tungah gamtatsiatna mu lo hi. Topa amau’ Pasian, amaute tawh om a, kumpipa phatna awging amaute’ lakah om hi. Pasian in Egypt panin amaute paikhiatpih a, amaute in gamsial tha bang hatna nei uh hi. Bang hang hiam cih leh Jakob mite a kibum nading om lo a, Israel mite’ langkhatah aisan ding om lo hi. Tu-in Israel-te tawh kisai-in, ‘Pasian’ sepna en un,’ kici ding hi. En un, hua mite! Humpinelkai bangin thoto a, humpinelkai bangin kaangto hi. A an a nek mateng, amaute’ si a dawn mateng, lumsuk lo hi,” a ci hi. Tua ciangin Balak in Balaam kiangah, “Amaute samsia peuhmah kei inla, thupha zong pia peuhmah kei in,” a ci hi. Ahih hangin Balaam in Balak kiangah, ” Topa’ cih khempeuh keimah in ka hih ding hi,’ hong ci hi lo ka hi hiam?” ci-in a dawng hi. Balak in Balaam kiangah, “Tu-in hong pai in; mun dangah kong paipih ding hi. Tua lai panin amaute nong samsiatsak nading Pasian in hong lungkimpih kha ding hi,” a ci hi. Tua ahih ciangin Balak in sehnel gam a kimuh sukna Peor mual dawnah Balaam paipih hi. Tua ciangin Balaam in Balak kiangah, “Hih lai-ah kei a dingin biakna tau sagih hong bawlsak inla, bawngtal sagih le tuutal sagih hih lai-ah hong pia in,” a ci hi. Balaam’ cih bangin Balak in hih a, biakna tau simah bawngtal khat le tuutal khat ciat a pia hi.