Tedim Lai Siangtho

bible

Topa in kei kiangah thu hong gen a,
"Mihing ahi Ezekiel aw, khatvei lai-in unau numei nih om hi.
Amaute Egypt-ah a omlai, a khangno laitakun, a nungakna lim uh bei-in numei paktat a suak uh hi.
A unu min Oholah hi a, Samaria khuapi tawh kibang a cihnopna ahi hi. A naunu min Oholibah hi a, Jerusalem khuapi tawh kibang a cihnopna ahi hi. Hih numei nihte ka tenpih a, a nihun kei tawh ta nei uh hi.
Keima zi hinapi-in Oholah pen numei paktatte mah bangin gamta lailai a, Assiria gam pana a lawm ngaihte lunggulh mahmah hi. Tua a lawm ngaihte pen
puansan a silh galkap hangte, gam uk mangte, leh galkapmang liante hi a, a vekpi-un a ngaihhuai, sakol tung tuang galkapmang liante ahi uh hi.
Amah pen Assiria uliante khempeuh tawh a mawhsa khat hi a, ama huk luatna hangin Assiria milimte nangawn va bia hi.
A nungakna beisakin, Egypt gama a paktat mah zom lailai hi. A nungak tunga kipanin mite in luppihin numei paktatte bangin bawlin a ut utun hih uh hi.
Tua ahih ciangin a lunggulh mahmah, a it Assiria mite khutsungah amah ka pia hi.
Assiria mite in a puan hawkkhiatsak uh a, a tanu leh a tapate matsakin, tua ciangin namsau tawh amah that uh hi. Mun khempeuha numeite in amah gentehna khatin nei uh a, ama tungah thu kikhen hi.
"A naunu Oholibah in hih thu thei napi-in, a unu Oholah sangin zong a siazaw, a sukzaw-in paktat lai hi.
Amah in a vekpi-in a ngaihbaang Assiria mi tangval ahi gam ukte leh galkapmangte, puansan a silh galkapte, leh sakol tung tuang uliante nak lunggulh mahmah hi.
Hih a naunu zong a u zah mahin sia taktak hi, ci-in ka mu hi.
"A paktatna nakpi takin hong sia semsem hi. Amah in Babylon uliante limte, kawm tungah a san zeza-in a kizut, a kawngten puan leh a dialkhip kaite tawh cingtakin a kibawl limte a muh ciangin hoihsa mahmah hi.
Amah in tua limte a muh phetin amaute lunggulh mahmah pah a, a sam dingin Babylon gamah kamtai a paisak pah hi.
Babylon mite zong amah tawh a mawh dingin hong pai uh hi. Amaute in a lungkim dongun tuanu hih nilohin ninsak uh a, a tawpna-ah amaute a ngaih genloh a kihzah ciangdongin a bawl uh hi.
Amah numei paktat ahihna mi khempeuh theisakin, tua bangin amah leh amah a kipholak ciangin a unu ka muhdah zah mah bangin amah zong ka mudah hi.
A paktatna uang semsem a, a nungak lai-in Egypt gamah a paktat mah bangin gamta niloh hi.
Sakoltal lan bangin a zang a gol, a lan mahmah mi khempeuh ngai pahpah hi.
Tua hi a, Oholibah aw, Egypt gamah nungakin na omlai-in na nawi hong kinuaigawp sakin, na nungakna na beisak huna na gamtat hoihlote mah a gamtakik nuam na hi hi.
"Oholibah aw, Topa Pasian ahi keima hong gen thu in: Tu-in nang in hih na lunggulh mite na cimtakta hi. Ahi zongin nangma tungah amaute ka hehsak ding a, nang a hong umcih dingin kong paipih ding hi.
Babylon khuamite, Khaldea gammite, Pekod mite, Shoa mite, Koa mite, leh Assiria mite khempeuh kong paipih ding hi. Amaute a vekpi-in tangval melhoih, a ngaihbaang gam ukte leh galkapmangte hi a, a vekpi-un ulianpipi, sakol tung tuang galkapmang liante vive ahi uh hi.
Amaute in leilu lam panin nang hong sim ding uh a, leeng galkap leh vanpua leeng tampi hong kengin galkap tampi tak tawh hong kuan ding uh hi. Lumte leh siklukhute tawh kidalin amaute in nang hong umcih ding uh hi. Amaute khutsungah nang kong ap ding a, amaute ngeina om bangin nang tungah thu hong khen ding uh hi.
Nangma tungah kei heh ka hih manin nangma tungah amaute hong heh gamtat ding uh hi. Na nak leh na bilte hong atkhiatsakin na tate hong thahsak ding uh hi. Na tanu leh na tapate na kiang panin hong sutin a hingtangun hallum ding uh hi.
Na puante hong hawkkhiatsakin, a manpha na kizepnate zong hong laksak ding uh hi.
Na huknate leh Egypt gama kipan na gamtat hoihlohnate ka beisak ding hi. Milimte etin na nei nawn kei ding a, Egypt-te zong na ngaihsun nawn kei ding hi.
"Bang hang hiam cih leh Topa Pasian in hih bangin ci hi: Na muhdah na etsat mite khutsungah nang kong pia ding hi.
Amaute zong nangma tungah hong muhdah gamtat ding uh a, na thalawhsa na khempeuh hong laksakin na hawmguakin hong nusia ding uh hi. Na paktat gamtatnateng hong kipholak ding hi. Na hukna leh na paktat gamtatna in
nangma tungah hih bangteng hong tungsak hi. Minam dangte tawh na paktat a, a milimte uh tawh na kininsak hi.
Na unu khekhapteng mah tawn na hih manin amah gim ka piak bangin nang zong gim ka hong pia ding hi.
Topa Pasian in hih bangin ci hi: Na unu hai mah na dawn ding a, tua hai golin thuk mahmah hi. A hai dim sitset ahih manin mi khempeuh in hong simmawhin hong nuihsan ding uh hi.
Na unu Samaria hai pen launa leh siatna hai hi a, hong amsakin hong lungkhamsak ding hi.
Tua hai a tawdat nangawn na dawn kang ding a, a hai na petkham ding hi. A hai kitam themte tawh na nawi na kuikham ding hi, Topa Pasian in ci hi.
"Tu-in Topa Pasian in hih bangin gen hi: Nangmah in kei hong mangngilhin hong nungngat na hih manin na hukna leh na paktatna hangin na thuak ding hi," a hong ci hi.
Topa in kei kiangah thu hong gen a, "Mihing ahi Ezekiel aw, Oholah leh Oholibah tungah thukhen dingin na kithawi nai hiam? A gamtat hoihlohna teng uh amaute tungah gen in.
Amaute in milim biakna tawh nulepa mawhna bawlin mi zong that lai uh hi. Milimte tawh mawhna gamta-in, kei tawh a neih a tapate uh that uh hi. A tapate uh milim biakna-in go uh hi.
Amaute gamtatna tu-a bangteng bek hilo lai hi. Ka biakinn ninsak uh a, ka Sabbath-te zong palsat lai uh hi.
Milim biakna-in ka tate a gawh khit uh ciangin tua ni mahin ka biakinn-ah pai-in ninsak uh hi. Ka biakinn sungah hih bangin gamta tazen uh hi.
"Amaute in gamlapi-a a om mite a sam dingin kamtai sawl uh a, a sap mite hong pai uh hi. Hih numeite kisilin, a mit uh zemin, kizepna a manpha a tuamtuamte tawh kizemin kipuah uh hi.
Lupna hoih mahmah tungah tu-in a mai uhah sabuai limtakin koih uh hi. Tua sabuai tungah keima piaksa paknamtui leh oliv thaute koih uh hi.
Lungnuamin a om mihonte gamlumna kiza a, gamlak panin mihon mawkmawk pawlkhat zong hong kitunpih hi. Amaute in tua numeite khutah tau butsak uh a, a lu tung uhah kumpi lukhu hoihte khusak uh hi.
Nulepa mawhna bawlin a paat ngingeisa numei khat, numei paktatte khat mah bangin a hih lailai uh hi tah a, ci-in ka ngaihsun hi.
Numei paktatte kianga a hawh bangin amaute pai niloh uh hi. Tu-a bangin a gamtat hoihlo Oholah leh Oholibah-te kiangah a paktat dingin amaute a pai uh hi.
Amaute in nulepa mawhna bawlin mi thahna tawh zong kipelhlo uh ahih manin midikte in nulepa mawhna bawlna hang leh mi thahna hangin a mawhsak ding uh hi.
"Topa Pasian in hih bangin ci hi: Amaute lausak gawpin a nate uh a sutgawp dingin mihon khat paisak in.
Tua mihonte in amaute suang tawh dengin, namsau tawh amaute sugawp hen la, a tate uh thatin, a innte uh halsak hen.
Amaute gamtat bangin kuamah a gamtatlohna dingun gamsunga a om numei khempeuh hilhkholhna limin hih bang gamtat hoihlohnate, gamsung khempeuhah ka beisak ding hi.
No unau numei nihte ahih leh, na paktatna uh leh na milim biakna hangun gim kong pia ding hi. Tua ciangin Topa Pasian ka hihna thu na hong thei ding uh hi," a hong ci hi.

Brand Slider

 Bible
 Books
 Oldbok
 Music
 Videos
 Movies
 Tutorials