Tedim Lai Siangtho

bible

Tua ciangin Job in dawng a,
"Tu laitakin Pasian tungah a phunlo, a hehloin ka om thei kei a, thumloin ka om thei kei hi.
Amah ka zon dan ding thei-in, ama kiang ka tunna ding zia a thei hi leng,
a mai-ah ka thu ka gen ding a, kei ka dikna thu a kicingin ka gen ding hi.
Ama hong gen ding thute leh kei a hong dawnna ding thute ka thei nuam hi.
Pasian in a thaneih khempeuh tawh keima langkhatah hong pang ding ahi hiam? Hong langpanlo ding a, ka thugen hong ngai ding hi.
Kei a thuman ka hi a, Pasian kiangah ka gen ding hi. Kuama phelzawh nawnloh dingin kei dikna a genkhia ding hi.
"Ahi zongin Nisuahna lam ka zong a, Pasian ka mu kei hi. Nitumna lam ka zong a, amah ka mu thei tuan kei hi.
Leilu lam ka zon hangin amah ka mu thei kei a, Leitaw lam ka zon hangin zong amah ka mu thei tuan kei hi.
Ahi zongin Pasian in ka kalsuanna khempeuh thei a, kei hong ze-et leh ka sianthona a mu ding hi.
Ama hong lamlahna citakin ka zui cinten a, lam ka pial ngei kei hi.
Pasian thupiakna bangin ka gamta ngitnget a, keima utna zuiloin ama deihna ka zui hi.
"Amah kikheel ngeilo a, kuamah in amah nial zolo hi. Ama hih nopte kuamah in khaktan zolo hi.
Tua ahih manin kei-a dingin a geelsate tungsak ding hi. Amah in hih bangin geelna tampi tak a nei ahi hi.
Tua hi a, ama omna-ah kei ka lau mahmah a, ka ngaihsut khak ciangin amah ka kihta hi.
Vanglian Pasian in ka lungsim hanna hong mangsak hi.
Khuamial in ka mit a mialsak hangin keima kihtak pen khuamial hilo a, Pasian ahi hi.

Brand Slider

 Bible
 Books
 Oldbok
 Music
 Videos
 Movies
 Tutorials