Tedim Lai Siangtho

bible

Christian pawlpi a kipat cil hun in, Thuciam Lui Laibu simloh Bible minpua Lai Siangtho cih bang om nailo hi. Ahi zongin nungzuipite leh sawltakte’n gupkhiatna tawh kisai lungdamna thute thu-um mite tungah kam tawh (Oral) ahi zongin, laikhak (Epistles)tuamtuam tawh ahi zong tatsatlo in hilh-in gen den uh ahih manin tua thu-um mite khempeuh zong upna lamah na picing mah mah uh hi. Jesu thu a um mikhempeuhte pawlkhat/pumkhat hong suak uh a, tua kipawlna sungah a kihel mite pen "Christiante" cih min hong ngah hi. Amasa penpen Christian ci-in a kisapna mun pen Antioch khua ahihi. Tua thu-um mite Synagogue a kici Jews minamte kikhopna inn/munte-ah hong kikaikhawm uh a, tua kikhopna munte-ah a kisim laibu pen Thuciam Lui laibu hi-a, tua in thuzui masate a dingin Lai Siangtho hong suak hi.

Sawltakte hong khangham tektek ta ahih manin, Christian thuzui masate in khangthakte a ding akhualna un Lungdamna thu tawh kisai sawltakte hilh thute leh Topa Jesu pianzia/tangthute sawltakte in lai tawh hong gelh khiat na ding uh lunggulhna hong nei uh hi. Tua tawh kizawitawn in St.Paul laikhakte leh sawltakte laikhak tuamtuamte hong piangkhia ahi hi. Sawltakte phak zawhlohna khua leh munte-ah tua laikhakte pen kikhopna leh biakpiakna hun sungah kisim hi. Tua zawh a sawtlo ciangin, Topa Jesu thu a kigelhna (Four Gospels) Lungdamna Lai Siangtho Bulite hong piangkhia leuleu a, lungdamkoh nekkhawm biakpiakna[1] munte-ah zatpi in hongnei ta uh hi.

Kum zalom nih pawl ciangin, Gnostic heresy a kici pawlpi upna thu alangdo pawlkhat hong piangkhia a, tuate in Sawltak Peter leh sawltak dangte at Lungdamna Lai Siangtho cih min puasak in Topa Jesu nuntakzia tawh kisai amanlo thu pawlkhat hong phuaktawm in Pawlpi leh thuzuite hong nawngkai sak uh hi. Ahi zongin tua hun laitak in France bible gam Lyon khua-ah Bishop a sem St. Irenaeus in Pawlpi in Kha Siangtho makaihna tawh Lungdamna Lai Siangtho in a ciapteh Laibu 4 bek om a, tuate in, Mate, Marku, Luka leh John te hi, ci-in khauh tak in na dawngkik hi. St. Irenaeus pen Lungdamna Lai Siangtho bu 4 leh St.Paul laikhakte Lai Siangtho man taktak hi ci-in hong ciaptehsak masa penpen RC bishop ahi hi. Ama hong ciaptehsakna hangin New Testament akici Thuciam Thak Lai Siangtho a kinei hong suak hi.

AD 313 kum ciangin, Constantine’s decree a kici Upna suahtakna laipi Emperor kumpipa Constantine in hong hawmkhia in, Pawlpi bawlsiatnate hong veng ta a, Christian thuzuite upna thu-ah suakta takin hong nungta thei ta uh hi. Alianbel Siampipa leh Siadawpi te’n zong pawlpi tawh kisai nasepnate tangzai takin hong sem thei ta uh hi. Tua dung zui-in AD 360 kum in Laodicea a kici khua-ah Khawmpi [2]khat hong nei uh-a, tua mun panin Alianbel Siampipa le Siadawpi te ki thukimna tawh Thuciamlui leh Thuciamthak sunga kihel ding laibu teng hong tangko khia uh hi. Tua zawh kum 7, AD.367 ciangin Pope Damasus in Greek kamtawh akigelh LST pen avekpi in Latin kam tawh aletkhia dingin St. Jerome sawl hi. Tua hun laitak in Latin kam pen leitungah a kilimzat mah mah hun ahi hi. St. Jerome in zong Pope thupiakna mah bangin hong semkhia a, kum 30 khit AD 397 ciangin hong zo siang taktak ta hi. Tua a kiletkhiasa Laibu khempeuh Bukhat in kigawm in tua pen Pope Damasus mah in Bible ci-in min hong vawh sak a, tua min pen tuni ciang dong akip suak ahi hi.

Hih bangin Laibu khat-in hong piankhiat theihna dingin asem abawlte kuate hi-a, bang tanvei sawt hiam? cihte zong alung ngaih huai mah mah thu khat ahi hi. Thuciam Lui pen Septuagint a kici Greek kam tawh a kigelh Laibulom hi a, Palestine gam pualam a om Jews minam te’n kum sawtpi a zat khitsa uh ahih manin kizang paisuak thei hi. Ahi zongin Thuciam Thak sunga kihel ding laibute ahih leh nasiatak in sittel/kantelna kisam ahih manin tua hun-a thunei Alianbel Siampipa leh Siadawpi te’n buaipih mah mah uh hi.

Bible hong pian khiatna tangthu i et ciangin Vantung pan in hong kiasuk hilo a, Kha Siangtho lamlahna/makaihna tawh huntampi, tha gui thatang tampi leh ngaihsutna tampite a kigawm khit teh tua hun laitak a thu nei pi Pope Damian in Bible hi ci-in hong ciaptehsak manin tuni in ei Christiante i kiangtanpih mah mah ahi, Pasian Kammal bu or Lai Siangtho or Bible a kinei ahi hi.

Brand Slider

 Bible
 Books
 Oldbok
 Music
 Videos
 Movies
 Tutorials