Tedim Lai Siangtho

bible

Tu-in Paisan Pawi a kici Silngo Sawhloh Anlum Pawi hun hong naita hi.
Siampi liante leh Thukham hilh siate in mihonpite kihta uh ahih manin kuama theihlohin Jesuh a kithah theihna ding lampi a zong uh hi.
Tua ciangin sawmlenihte sung panin Iskariot tapa Judas sungah Satan hong lut hi.
Tua ahih manin Judas va paikhia a, siampi liante leh biakinncing palikmangte tawh va kiho uh a, amaute khutsungah Jesuh a piaktheihna dingzia a kikum uh hi.
Amaute na nuam mahmah uh a, sum tawh guaih dingin thuciam a na pia uh hi.
Judas zong thukim a, mihonte theihlohin amaute khutsungah Jesuh a piaktheihna ding lampi zonding a kipan pah hi.
Tua ciangin Silngo Sawhloh Anlum Pawi hunsungin Paisan Pawi an-a nekding tuuno gawh ni hun hong tung hi.
Jesuh in Peter leh Johan kiangah, "Va pai un la, eite Paisan Pawi annek ding va vaihawm un," ci-in a sawl hi.
"Koi lai-ah va bawl le ung hong deih na hi hiam?" ci-in a dong uh hi.
Amah in, "Jerusalem khuasung na lut uh ciangin tuibeel a pua pasal khat na mu ding uh hi. Ama lutna inn-ah zui un la,
a innteekpa kiangah, Siapa in: Ka nungzuite tawh Paisan Pawi an ka nektheihna ding uh inndei koi lai hiam, ci hi, ci-in va dong un.
Amah in a baihsa-in a na kikoihsa inndei tungnung a zai khat hong lak ding hi. Tua lai-ah a kisam khempeuh a baihsa-in na koih un," a ci hi.
Amaute gel zong pai uh a, Jesuh gensa bang teekteekin va mu uh a, tua lai-ah Paisan Pawi annek ding a bawl uh hi.
A hun a tun ciangin Jesuh zong sawltakte tawh sabuai-ah a tu hi.
Tua ciangin Jesuh in amaute kiangah, "Sihna ka thuakma-in note tawh hih Paisan Pawi an i nekkhop ding ka ut mahmah khat ahi hi.
A mantakin kong genin-ah, Pasian Ukna sungah a cingtaak Paisan Pawi hun hong tun mateng, Paisan Pawi an ka ne ngei nawn kei ding hi," a ci hi.
Tua ciangin Jesuh in a hai sang a, Pasian tungah lungdamna a kohkhit ciangin, "Hih hai hong sang un la, na vekpi-un na gual dawn un.
Bang hang hiam cih leh Pasian Ukna hun hong tun mateng, tu-a kipanin leenggahzu ka dawn nawn kei ding hi," a ci hi.
Tua ciangin anlum la-in Pasian tungah lungdamna a kohkhit ciangin amaute tungah pia a, "Hih pen note-a dingin a hong kipia keima pumpi ahi hi. Keimah nong phawkna dingun na ne un," a ci hi.
Tua mah bangin an a nekkhit uh ciangin amaute tungah hai pia a, "Hih leenggahzu pen note-a dingin a luangkhia, Pasian thuciamna thak a kipsak ka sisan ahi hi.
Ahi zongin kei hong lehhek dingpa khut in sabuai-ah kei tawh an a sawkkhawmna thu thei un.
Bang hang hiam cih leh Pasian sehsa bangin Mihing Tapa si ding a, ahi zongin amah a lehhekpa in gimna thuak ding hi," a ci hi.
Tua ciangin hih bangin a gamta ding eite lakah kua hi ding ihi hiam, ci-in amaute khatlekhat a kidong uh hi.
Nungzuite lakah kua a lianpenin kingaihsun ding, ci-in kiselna thu hong piang hi.
Tua ciangin Jesuh in amaute kiangah, "Gentail mi hih leitung kumpite in a mite uh tungah ukna aana zang uh a, tua bangin mi a uk Gentail-te in amaute pen, Mite nopsakna dingin nasemte, a kicih ding deih lai uh hi.
Ahi zongin note lakah tua bang hilo ding hi; a lianpenpa a neupen bangin om ding a, a makai penpa a nungzui nunungpen bangin om ding hi.
Anne dingin sabuai-ah a tupa leh an a piapa kua lianzaw ahi hiam? Anne dingin a tupa lianzaw mah hi. Ahi zongin kei pen note lakah anpia-in na a sempa bangin ka hong om hi.
"Gimna ka thuak sung khempeuh note in kei nong ompih uh hi.
Ka Pa in ukna ding aana kei tungah hong piak mah bangin kei zong note tungah ka hong pia ding hi.
Keima Ukna sungah anne tuidawnin sabuai kiimah na tu ding uh a, Israel minam sawmlenihte tungah thu a khen dingin thukhenna tokhom tungah na tu ding uh hi," a ci hi.
Tua ciangin Jesuh in, "Simon, Simon aw, lokhopa in buhhum a haih bangin note khempeuh hong ze-etna dingin Satan in thu a ngah khitna thu phawk in.
Ahi zongin, Simon aw, na upna na khahsuah lohna dingin nang-a dingin thu kong ngetsak khin hi. Kei kiangah nong kiheikik ciangin nungzui na lawmte na hanthawn in," a ci hi.
Tua ciangin Peter in, "Topa aw, nang tawh thong a kiakhawm ding leh a sikhawm dingin a kigingsa-in ka om hi," ci-in a gen hi.
Tua ciangin Jesuh in, "Peter aw, ken a mantakin kong genin-ah, Amah ka thei kei hi, ci-in thumvei nong nialkhit matengin tuni-in ak khuanglo ding hi," a ci hi.
Tua ciangin Jesuh in amaute kiangah, "Note in sumbawm, ip, leh khedap kengloin kong sawlkhiat lai-in kitangsapna na nei uh hiam?" ci-in a dot ciangin, "Bangmah ka kitangsapna uh omlo hi," ci-in a dawng uh hi.
Tua ciangin Jesuh in, "Ahi zongin, tu-in ahih leh, sumbawm ahi a, ip ahi zongin a neite in keng un la, namsau a neilo peuhmah in na puansilh uh zuak un la khat lei un.
Bang hangin hih bangin hong gen ka hi hiam cih leh, Lai Siangtho in, Mawhneite lakah amah kihelsak hi, ci-in keima thu a genna pen hong tung ding hi," a ci hi.
Amaute in, "Topa aw, en in; hih lai-ah namsau nih om hi," ci-in a gen uh ciangin Jesuh in, "Tua ahih leh phazo hi," ci-in a dawng hi.
Tua ciangin Jesuh a pai ngei zel bangin, khuasung nusia-in Oliv Mual tungah pai a, a nungzuite in zong a zui uh hi.
Ama painopna mun a tun ciangin amaute kiangah, "Ze-etna na tuahkhak lohna dingun thu ngen un," ci-in a gen hi.
Tua ciangin amaute kiang panin suanglot khat tan bang pailai a, khukdinin thu ngen a,
"Pa aw, nangma ngaihsutna bang ahihkhak leh hih ka thuakding gimna tawh hong kipelhsak in. Ahi zongin kei deihna bang hiloin nangma deihna bang hi ta hen," a ci hi.
Tua ciangin vantung panin ama kiangah vantung mi khat hong pai a, Jesuh tha a hatsak hi.
Lunggim mahmah ahih manin nakpi takin thu ngen semsem a, leilak-a si mal gol taak bangin a khua-ul a taak hi.
A thungetna panin dingin a nungzuite kiangah paikik a, amaute a dahna hangun gimin ihmu-in a om a mu hi.
Jesuh in, "Bang hangin ihmu na hi uh hiam? Tho un la ze-etna-ah na pukkhak lohna dingun thu ngen un," a ci hi.
Tua bangin thu a gen laitakin mihonpi khat hong pai a, sawmlenihte sung panin Judas a kici mipa hong makai-in Jesuh a nam dingin hong naih hi.
Ahi zongin Jesuh in ama kiangah, "Judas aw, napna tawh Mihing Tapa lehhek na hi hiam?" a na ci hi.
Jesuh kiima om mite in a thupiang ding a muh ciangun, "Topa aw, ka namsau uh tawh ka sat ding uh hiam?" a ci uh hi.
Amaute khat in siampi lianpenpa nasempa sat a, a taklam bil a satkhia hi.
Ahi zongin Jesuh in, "Tua bangin gamta nawn kei un," ci-in a mipa bil lawnsakin a damsak hi.
Tua ciangin Jesuh in amah a man dingin a hong pai siampi liante, biakinncing palikmangte, leh upate kiangah, "Namsau leh molhtum tawh kei hih dingin nong kuanna dingun kei pen gal leh sa ka hi hiam?
Nisimin biakinn-ah note tawh ka omkhawm a, bangmah nong cih kei uh hi. Ahi zongin hih hun pen nomau hun hi a, khuamial sung a uk Satan vangliat hunsung ahi hi," a ci hi.
Tua ciangin Jesuh manin paikhiatpih uh a, siampi lianpenpa inn a tunpih uh hi. Peter in zong a kihalin nungzuih hi.
Inntualah meiphual kicih a, tua meiphual kiima tute lakah Peter zong a kihel hi.
Mei awi-a omte lakah Peter a omlam, nasem numei khat in a muh ciangin limtakin Peter en a, "Hihpa zong Jesuh tawh a kikhawlte khat hi," a ci hi.
Ahi zongin Peter in, "Ka nau aw, amah ka thei kei hi," ci-in a nial hi.
Tua khit a sawtloin midang khat in amah hong mu leuleu a, "Nang zong amaute tawh pawlkhat na hi hi," a ci hi. Ahi zongin Peter in, "Lawm aw, ka hi kei hi," a ci hi.
Tua khit nai lang bang ding ciangin midang khat in, "Hih mipa Galilee mi ahih manin amah zong Jesuh tawh a kipawlte hi taktak hi," hong ci teitei hi.
Ahi zongin Peter in, "Lawm aw, na thugen ka thei kei hi," ci-in a dawng hi. Tua bangin a pau laitakin thakhatin ak hong khuang hi.
Jesuh zong kihei-in Peter hong en a, "Tuni-in ak a khuan ma-in thumvei nong nial ding hi," ci-in Topa kampauna thu Peter in hong phawkvat hi.
Tua ciangin Peter paikhia-in nakpi takin a kap hi.
Jesuh a cingte in simmawh bawlin a sat uh hi.
Puan tawh a mit tuamsak uh a, "Kuan hong sat ahi hiam, thei dih in," a ci uh hi.
Amah simmawh bawlna kam tampi a pau uh hi.
Khua a vak ciangin upate, siampi liante, leh Thukham hilh siate hong kikhawm uh a, uliante mai-ah Jesuh hong kipaipih hi.
Amaute in, "Khrih na hi hiam, hong gen in," ci-in a dot uh ciangin Jesuh in, "Kong gen hangin nong um kei ding uh a,
thu kong dot hangin zong nong dawng kei ding uh hi.
Ahi zongin tu-a kipanin a Vanglian Pasian taklamah Mihing Tapa tu ding hi," ci-in a dawng hi.
Tua ciangin a vekpi-un, "Tua ahih leh Pasian Tapa na hi hiam?" a cih uh ciangin, "Pasian Tapa hi, nong ci uh hi," ci-in a dawng hi.
Tua ciangin amaute in, "Thudang bangmah kisam nawnlo hi. Ama kam mahmah panin i za khinta hi," a ci uh hi.

Brand Slider

 Bible
 Books
 Oldbok
 Music
 Videos
 Movies
 Tutorials