Tedim Lai Siangtho

bible

Jerusalem khuanai, Bethfage khua a omna Oliv Mual a tun uh ciangin Jesuh in a nungzuite nih ma sawl a,
"Mai-a a om khua-ah va pai un. Na tun uh ciangin la nuta khau a kikhih na mu ding uh hi. Hong sut un la hong kai un.
Mi khatpeuh in hong paupih leh, Topa in deih hi, ci le uh cin hong paisak pah ding hi," ci-in a vaikhak hi.
Hih thu pen kamsangpa thugenna a tunna dingin a piang ahi hi.
Tua a genna-ah, "En un, na kumpipa uh hong pai hi. Kiniamkhiatna tawh lapi tung leh lano tungah tuangin hong pai hi, ci-in Zion khuamite kiangah gen un," a ci hi.
Nungzuite gel zong Jesuh sawl bangin va pai uh hi.
Amaute in a la nuta hong paipih uh a, a tungah a puante uh a phah khit uh ciangin Jesuh a tuang hi.
Mihon tampite in ama paina ding lampi-ah a puante uh na phah uh a, adangte in nisuh hiangte satin lampi-ah a na phah uh hi.
A mai-a pai mihonte leh a nunga zui mihonte awng uh a, "David suan Jesuh in phatna ngah ta hen! Topa min tawh hong paipa in thupha ngah ta hen! A sangpena om Pasian in phatna ngah ta hen!" a ci uh hi.
Jerusalem khuasung a tun uh ciangin khuasung mi khempeuh gamlum henhan uh a, "Hihpa kua ahi hiam?" ci-in khatlekhat a kidong uh hi.
Mihonpite in, "Galilee gam Nazareth khua pana kamsang Jesuh hi," ci-in a dawng uh hi.
Tua ciangin Pasian biakna innpi huang sungah Jesuh lut a, tua sungah van zuak van lei-a a om mi khempeuh a hawlkhia hi. Sumkhek nasemin a om mite sabuai leh vakhu zuakte tutnate a lumletsak gawp hi.
Amaute kiangah, "Pasian in Lai Siangtho sungah, Ka inn pen thungetna inn kici ding hi, ci napi-in, note in guktakna phualpi na suaksak uh hi," a ci hi.
Biakinn sung Jesuh kiangah mittawte leh khebaite hong pai uh a, amah in amaute a damsak hi.
Ahi zongin siampi liante leh Thukham hilh siate in a na lamdang bawlte mu-in, biakinn sungah naupangte in, "David suan Jesuh in phatna ngah ta hen!" ci-in a kikona a zak uh ciangin heh uh ahih manin
Jesuh kiangah, "Hih naupangte otna na za hiam?" ci-in a dong uh hi. Jesuh in, "Ka za hi. Lai Siangtho sungah, Naungekte leh naupangte kam tawh a cingtaak phatna na gen sak hi, a cihna thu sim ngeilo na hi uh hiam?" ci-in a dawng hi.
Tua ciangin Jesuh in amaute nusia a, khuapi sung pan paikhia-in Bethany khua-ah a giak hi.
A zingsang ciangin khuapi zuanin hong paikik laitakin Jesuh a gil a kial hi.
Lam gei-ah theikung khat mu ahih manin a gei-ah va pai a, ahi zongin a teh simloh bangmah a mu kei hi. Jesuh in tua theikung kiangah, "Gah ngei nawn kei in!" a cih khit phetin a theikung a sipah hi.
Nungzuite in a muh uh ciangin lamdangsa uh ahih manin, "Bang hangin theikung tuaci sihpah ahi hiam?" a cih uh ciangin
Jesuh in, "Note kiangah a mantaka kong genin-ah: Note in uplahna nei hetloin, upna taktak na neih nak uh leh hih theikung tungah a piang bang na hih theih uh banah, hih mual kiang nangawnah, Na omna pan paikhia-in tuipi sung kidenna in, ci le uh cin na cih bangun piang ding hi.
Upna na neih nak uh leh na nget peuhpeuh uh na ngah ding uh hi," a ci hi.
Biakinn tual sungah Jesuh lutkik a, thuhilhin a om laitakin siampi liante leh upate ama kiangah hong pai uh a, "Hih nate kua thu tawh bawl a, na bawlna ding kua in aana hong pia ahi hiam?" ci-in a dot uh ciangin
Jesuh in, "Kei zong thu khat kong dong masa ding hi. Na hong dawn nak uh leh kei zong kua thu tawh bawl cih ka hong gen ding hi.
Johan in tuiphum theihna ding thu koi lai panin ngah ahi hiam? Pasian kiang panin thu ngah ahi hiam, ahih kei leh mihingte kiang panin thu ngah ahi hiam?" a ci hi. Amaute khatlekhat kiseel uh a, "Pasian kiang pan hi," ci lehang, "Bang hangin umlo na hi uh hiam?" hong ci ding hi.
Ahi zongin, "Mihingte kiang pan hi," ci leuleu lehang, mi khempeuh in Johan pen kamsang hi, ci-in ngaihsun uh ahih manin mihonte i kihta zel hi, kici uh hi.
Tua ahih ciangin Jesuh kiangah, "Ka thei kei uh hi," ci-in a dawng uh hi. Jesuh in zong amaute kiangah, "Kei zong hih nate, kua thu tawh ka bawl cih ka hong gen kei ding hi," a ci hi.
Tua ciangin Jesuh in amaute kiangah, "Note in bangci ngaihsut na hi uh hiam? Mi khat in tapa nih nei hi. A ta uzaw kiangah, Ka ta aw, tuni-in leenggah lo-ah va kuan in, ci-in a sawl ciangin
amah in, Kuan nuam kei ing, ci napi-in a lungsim kikheelin a kuankik hi.
Tua ciangin a ta nauzaw kiangah tua mah bangin va ci a, Pa aw, va kuan mah ning, ci napi-in a kuan kei hi.
Hih tapa nihte sung panin a koi bel pen a pa deih bangin gamta ahi hiam?" a ci hi. Amaute in, "A ta uzaw a ta hi," a ci uh hi. Tua ciangin Jesuh in amaute kiangah, "Note kiangah a mantaka kong genin-ah: Pasian ukna sungah note sangin siahdongte leh numei paktatte lut masazaw ding hi.
Bang hang hiam cih leh note kiangah Tuiphumpa Johan hong pai-in thuman lampi hong lak napi-in na um kei uh a, ahi zongin siahdongte leh numei paktatte in a um uh hi. Hih thu na theih khit uh ciang nangawnin na lungsim uh na kheel nuam tuan kei uh a, na um kei veve uh hi.
"Thugentehna dang khat na ngai lai un. Mi khat in lo zuanin leenggui suan a, a kimkot umin, leenggah cilna ding bawl a, a honna ding tausang khat a lam khit ciangin lo khawhlawhte khawhlawh sakin gamdangah a pai hi.
Leenggah min hun a tun ciangin ama ngahding teng a va la dingin lo khawhlawhte kiangah a nasemte a paisak hi.
Lo khawhlawhte in a nasemte na manin khat na satgawp uh a, khat na thatin, khat suang tawh na denggawp uh hi.
Tua ciangin lo neipa in a masa-a sangin nasem a tamzaw va paisak leuleu a, ahi zongin a masa-a mah bangin a nasemte a na bawlsia veve uh hi.
Tua khit ciangin ka tapa paisak leng na zahtak ding uh hi, ci-in ngaihsun ahih manin a tapa a paisak hi.
Ahi zongin lo khawhlawhte in a tapa a muh uh ciangin, Hihpa pen a gamhluah dingpa ahi hi. Hong pai un; amah thatin a luah dingteng eite in la ni, a kici uh hi.
Tua ahih manin amah manin that uh a, lo nawlah a paai uh hi.
Tua ahih ciangin leenggah lo neipa hong pai ciangin a lo khawhlawhte bangci bawl ding ahi hiam?" ci-in a dong hi.
Amaute in, "Tua migilote thatgawp ding a, a hun hunin leenggah a pia ding lo khawhlawh dangte khosak ding hi," a ci uh hi.
Jesuh in amaute kiangah, "Lai Siangtho sungah, Innlamte in a nilkhiat suang pen innkiu suang bulpi suak khinta hi. Hih pen Topa bawl hi a, i muh ciangin lamdang i sa hi, ci-in a kigelhna sim ngeilo na hi uh hiam?
Tua ahih ciangin note kiangah kong genin-ah: Note pen Pasian hong ki-uksak nawnlo ding a, a kilawmin a gamta ding mite bek Pasian in uk ding hi.
Hih suang tungah a kia mi khempeuh kizan gawp ding a, mi khat peuh tungah tua suang a kiat leh zong dengzan gawp ding hi," a ci hi.
Siampi liante leh Farisi mite in hih thugentehna a zak uh ciangin amaute a cihnopna-in a gen ahihlam a phawk uh hi.
Jesuh a man dingin kithawi uh a, ahi zongin mihonte in kamsang khatin ngaihsun uh ahih manin mihonte a kihtak manun a man ngam kei uh hi.

Brand Slider

 Bible
 Books
 Oldbok
 Music
 Videos
 Movies
 Tutorials