Tedim Lai Siangtho

bible

Tu-in Jerubbaal tapa Abimelek, Shekhem-a a nu tanaute kiangah pai-in amaute khempeuh kiangah,
"Shekhem khuami khempeuh huau-in gen un, Jerubbaal tapa sawmsagihte a vekpi in note hong uk ding leh khat in note hong uk ding, note-a dingin koi hoihzaw ahi hiam? a ci hi. Kei pen note guh note sa ka hihna zong phawk un," a ci hi.
Tua ciangin a nu tanaute in ama tangin Shekhem mite khempeuh tungah hih thute gen uh hi. Tua ciangin amaute lungsim Abimelek zuih ding lamah hoi hi; bang hang hiam cih leh amaute in, "Amah i naihuai ahi hi," a ci uh hi.
Tua ciangin amaute in Baaberith inn panin ngun pek sawmsagih Abimelek pia uh a, amah in ama nung a zui, bangmaha a kimanglo leh thu ngaihsun theilo mite cialna hi.
Tua ciangin Ofrah-a a pa inn-ah amah pai-in, Jerubbaal tapa a sanggam mi sawmsagihte suang khat tungah a that hi. Ahih hangin amah bu ahih manin Jerubbaal tapa neupen Jotham a suakta hi.
Tua ciangin Shekhem khuamite khempeuh leh Bethmilo khuamite khempeuh hong paikhawm uh a, amaute in Shekhem khua-a tawsaw songpi kiangah Abimelek kumpi a suaksak uh hi.
Jotham kiangah tua thu a kigen ciangin amah pai-in Gerizim Mual dawnah ding a, nakpi-in kiko-in amaute kiangah, "No Shekhem mite aw, Pasian in note thu hong ngaih theihna dingin ka thu hong ngai un.
Khatvei, singkungte amau tungah kumpi-in sathau a nilh dingin kuankhia uh a, amaute in oliv kung kiangah, Kote hong uk in, a ci uh hi.
Ahih hangin oliv kung in amaute kiangah, Keimah in pasian-te leh mite a kipahtawina ahi ka thaunate nusia-in singkungte a uk dingin hong pai ding ka hi hiam? ci hi.
Tua ciangin singkungte in theikung kiangah, Hong pai in la, kote hong uk in, ci uh hi.
Ahih hangin theikung in amaute kiangah, Keimah in ka khumna leh ka gah hoihte nusia-in singkungte a uk dingin hong pai ding ka hi hiam? ci hi.
Tua ciangin singkungte in leenggui kiangah, Hong pai in la, kote hong uk in, ci uh hi.
Ahih hangin leenggui in amaute kiangah, Keimah in pasian-te leh mite a lungnuamsak ka leenggahzu nusia-in singkungte a uk dingin hong pai ding ka hi hiam? ci hi.
Tua ciangin singkung khempeuh in thangling kung kiangah, Hong pai in la, kote hong uk in, ci uh hi.
Thangling kung in singkungte kiangah, Note tungah kumpi-in lungsim tak tawh sathau hong nilh na hih uh leh, hong pai un la, ka liimah hong bu un. Ahi zongin ka liim nuai-ah nong buk kei uh leh, thangling kung lak panin meikuang hong paikhia hen la, Lebanon taamtak kungte kangtum hen, ci hi.
"Tua ahih ciangin tu-in Abimelek kumpi-in na bawl uh ciangin lungsimtak leh thumantak mah tawh a gamta na hi uh hiam? Jerubbaal leh a innkuan tungah thuman takin gamta-in ama sepna tawh a kituakin amah a bawl mah na hi uh hiam?
Bang hang hiam cih leh ka pa in note-a ding hong dosakin a lauhuaina sungah a nuntakna pia a, Midian-te khutsung panin note hong honkhia hi.
Ahi zongin tuni-in ka pa innkuan langkhatah note pangin a tapate mi sawmsagih suang khat tungah na that uh a, ka pa in a nasem numei tawh a neih a tapa Abimelek pen note naihuai ahihna hangin Shekhem khuamite tungah kumpi-in na bawl uh hi.
Note in tuni-in Jerubbaal leh a innkuanpihte tungah lungsimtak leh thumantak tawh a gamta takpi mah na hih uh leh, Abimelek tungah note lungdam un la, note tungah zong amah lungdam ta hen.
Ahih hangin tua bang ahih takpi kei leh, Abimelek sung panin meikuang hong paikhia hen la, Shekhem leh Bethmillo khuamite kangtum hen. Shekhem khuamite sung pan leh Bethmillo khuamite sung panin meikuang hong pai hen la, Abimelek kangtum hen," a ci hi.
Tua ciangin a sanggampa Abimelek a kihtakna hangin Jotham taikhia-in Beer-ah pai-in tua lai-ah a teng hi.
Abimelek in Israel-te tungah kum thum sung uk hi.
Pasian in Abimelek leh Shekhem mite kikalah kigalneihna omsak a, Shekhem mite in Abimelek lehdo uh hi.
Tua pen, Jerubbaal tapa sawmsagihte a kithahna thu tawh kisai-in, amaute a that a sanggampa uh Abimelek, leh a sanggamte thahna dingin a hanthawn Shekhem mite tungah thukkikna hong tuntheihna dingin a kibawl mahmah ahi hi.
Tua hi a, Shekhem mite in Abimelek a pangsim dingin mual dawnah mi koih uh a, amaute in tua lam a tawn mi khempeuhte na na sut uh hi; hih thu Abimelek kiangah kigen hi.
Tua ciangin Ebed tapa Gaal a tanaute tawh Shekhem-ah hong kikhin uh hi. Shekhem mite in amah muang uh hi.
Amaute lo-ah kuanin a leenggui uh panin leenggah khawmin cil uh a, pawi khamin amaute pasian inn-ah pai uh a, an ne tui dawnin omin Abimelek zahko uh hi.
Tua ciangin Ebed tapa Gaal in, "Abimelek, kua hi a, ama na i sepsak dingin ei Shekhem mite kua ihi hiam? Jerubbaal tapa leh ama ulian Zebul in Shekhem mite pulepa Hamor na sem uh hilo ahi hiam? Tua ahih ciangin bang hangin ama na sem ding ihi hiam?
Hih mite keima khutnuai hi leh! Abimelek ka khinkhia ding hi. Abimelek kiangah, Na galkap behlap in la hong kuankhia in, ka ci ding hi," a ci hi.
Tua khuapi a uk Zebul in Ebed tapa Gaal kammalte a zak ciangin heh mahmah hi.
Amah in Arumah khua-a om Abimelek kiangah kamtaite sawlin, "En in, Ebed tapa Gaal leh a tanaute Shekhem-ah hong pai-in nang langpangin tua khuapi sosuah hi.
Tua ahih ciangin tu-in na ompih mite tawh zanin pai un la, gamlakah pangsim un.
Tua ciangin zingsang ni a suah phetin tho baih un la, khuapi simgawp un. A ompih mite tawh nang a do dingin hong kuankhiat ciangun ahi thei bangin amaute tungah na bawl ding uh hi," cisak hi.
Tua ciangin Abimelek leh amah tawh a om mite khempeuh zanin tho-in pawl li kisuahin Shekhem a sim dingin pangsim uh hi.
Tua ciangin Ebed tapa Gaal paikhia-in khuapi kulhkongpi lutna-ah ding a, Abimelek leh amah tawh a om mite zong a pansimna panun dingto uh hi.
Gaal in tua mite a muh ciangin amah in Zebul kiangah, "En in, mual dawn panin mite hong paisuk!" a ci hi. Zebul in ama kiangah, "Mual liimte mi bangin a mu na hi hi," a ci hi.
Gaal pau kikin, "En in, a gam laizang panin mite hong paisuk a, Aisante Tawsaw lam panin pawlkhat hong pai hi," a ci hi.
Tua ciangin Zebul in ama kiangah, "Tu-in na kamhanna koiah om ahi hiam? Ama na i sep dingin Abimelek kua ahi hiam? a cipa hilo na hi hiam? Hih mite, na simmawhte hilo ahi hiam? Tu-in paikhia in la amaute tawh kido in," a ci hi.
Tua ciangin Shekhem mite mai-ah Gaal kuankhia-in Abimelek tawh kido hi.
Abimelek in Gaal delh a, ama mai-ah Gaal a tai hi. Kulhkongpi lutna ciangdong nangawnah mi tampi liamin tuk hi.
Tua ciangin Arumah-ah Abimelek a teng hi. Zebul in Gaal leh a tanaute hawlkhia a, amaute Shekhem-ah teng thei nawnlo uh hi.
A zing ciangin gamlakah Shekhem mite paikhia uh hi. Hih thu Abimelek kiangah kigen hi.
Amah in a mite la-in pawl thum suahin gamlakah pangsim uh hi. Tua ciangin amah khuadakin khuapi panin mite a kuankhia mu a, amaute do-in kipan a, amaute that hi.
Abimelek leh amah tawh a om a pawlte in thakhatin mainawt uh a, ama pawldang nihte in gamlaka om mite delhin a thah sungin khuapikulh lutna-ah amaute na ding uh hi.
Abimelek in sun tawntung tua khuapi sim a, tua khuapi la-in a sunga om mite that a, tua khuapi phiatin ci a vawh hi.
Shekhem Tausang mite khempeuh in tua thu a zak uh ciangin Elberith inn munmuanhuai-ah lut uh hi.
Shekhem Tausang mite khempeuh kikaikhawm uh hi, ci-in Abimelek kiangah kigen hi.
Tua ciangin amah tawh a om mi khempeuh tawh Zalmon Mual-ah Abimelek kuanto hi. Abimelek in a khutin hei khat la-in selkeu lom khat sat a, tuate la to-in a liangko tungah koih hi. Tua ciangin amah tawh a om mite kiangah, "Kei hih nong muhsa bangun kei hih bangbangin manlangin hih un," a ci hi.
Tua ahih ciangin mi khempeuh in amau-a ding ciat selkeu tomin Abimelek zui-in munmuanhuai simna dingin koih uh a, amaute in mei tawh munmuanhuai halin Shekhem Tausang mite, numei leh pasal mi tul khat bang a si hi.
Tua ciangin Thebez-ah Abimelek pai a, Thebez langpangin giahphual sat a, tua khua a la hi.
Ahih hangin tua khuapi sungah tausang muanhuai om a, tua khua numei leh pasal, tua khuami khempeuh tua tausangah tai-in kikhaknelh uh a, tausang khumah amaute om uh hi.
Tua ciangin Abimelek zong tausangah pai-in sim a, mei tawh a hal dingin tausang kongkhak a naih hi.
Numei khat in an gawina suangpeek tungnung, Abimelek lu tungah lawnin a lu guh dengkham hi.
Tua ciangin amah in ama hiam a tawisak tangvalpa nawh sapin ama kiangah, "Na namsau dok in la kei hong that in. Tua hi kei leh mite in, Numei khat in amah that hi, hong ci khading uh hi," a ci hi. A tangvalpa in amah sunletin amah a si ta hi.
Israel mite in Abimelek a sihna a muh uh ciangin amau inn ciatah a ciah uh hi.
Ama sanggam sawmsagihte thatin a pa tungah a khialhna hangin tua bangin Pasian in Abimelek khialhna a thuk ahi hi.
Pasian in Shekhem mite khempeuh gitlohna hangin Jerubbaal tapa Jotham samsiatna bangin amau tungah gimna a tungsak hi.

Brand Slider

 Bible
 Books
 Oldbok
 Music
 Videos
 Movies
 Tutorials