Gualzawhna Thusim
Gualzawhna Thusim
"Gualzawhna Thusim" cih thulu tawh David Tuang i gelh thalakna tomno khat a simnuamte a dingin anuai-ah kisimsuk thei hi...

Gualzawhna Thusim

David in ama pilna, ama siamna, leh ama thahatna tawh a thahat mahmah Goliat a zo hi zenzen lo hi. A thahat, a vanglian Pasian in amah ompihin, makaih ahih manin a zozo hizaw hi.

Na nuntakna sungah na pilna, na siamna, leh na thahatna ten bangmah hih zo lo kha mah ding hi. Ahi zongin, a thahat, a vanglian Pasian in nang hong ompihin, hong makaih nak leh, a kihtakhuai na mai hong liah/dal khempeuh na zozo ding hi.

David in, tuu cing kawmkawm mahin Pasian tawh kizomin, amah na phatphat ahih manin, Pasian lungkimsak/lungdamsak hi. David tungah Pasian lungkim ahih manin, naupangno (moi lai mahmah) hi mah taleh kumpi dingin sathau kinilh ngiat hi. David in sathau a kinilh nading mun va zuan lo a, sathau nilh ding Siampipa in David omna inn va zuanzaw mawk hi.

Miten zu leh sa ne-in, nuamsa-in om mah taleh tua bangte lakah kihel loin, biakinn mah pha tangtangin, i kikhawm khawm lel ding a, miten Pasian a phat nuam kei zongin, i omna peuhpeuh-ah, Pasian min phatin, ama hoihna thu i pulak/gengen lel ding hi. Tua bang i hih nak leh Topaín hong laamto ding a, ei tektekin thupha omna mun va zuat se kul loin, thupha in eima omna mun tektek hong zuan lel ding hi. Tua ahih manin, David mah bangin Pasian tawh maan takin kizomin, ama min i phatphat ding hi.

David in, “Phatna sungah gualzawhna om hi” cih thusim thei ahih manin, gualzawhna ngah takpi hi. Gualzawhna thusim pen phatna hi takpi hi. Joshua leh Kalebte in zong Jeriko kulhpi a cip theih nadingin, otna leh phatna mah zangin Pasian’ sawlna mang uh a, Paul leh Sailaste ii phatna hang mah tawh thonginn sungah nalamdang piangin, gualzoin, a suahtakna thute uh Lai Siangtho sungah i mu hi.

Tua ahih manin, i nuntakna sungah Pasian min phatphatin, ama ompihna leh ama makaihna i ngah theih nading i kisam den hi. Pasian ompihna leh ama makaihna i ngah theih nadingin, ama deihna bangin nungta-kalsuanin, nisim in amah tawh i kizom ding a, David mah bangin i omna peuhpeuhah Pasian liansakin, ama min i phatphat ding hi. Tua in hong gualzosak ding a, pahtawina zong hong ngahsak ding hi.

“Phatna sungah gualzawhna om a, gualzawhna thusim pen phatna ahi hi”

Source: David Tuang

What's your reaction?

Comments

https://siantongluan.net/assets/images/user-avatar-s.jpg

0 comment

Write the first comment for this!