Laigelhzia i cih ciangin laizepna zatzia cihna zah khatin laizep zatzia siam ding thupi hi. Lailep zatzia hih bangteng hi cihna hi loin hihte panin adang tampi i zon behlap ding, i theih behlap ding leh i zat siam beh ding tampi om lai hi cih phawkin i kisin behlap tohtoh lai ding kisam hi.

Husanna (,): A banbana kigelh minte deina: Lianpu, Ngaihno, Khuppi leh Niangta in la sa hi.
Lo lamah buh, vaimim, tang leh mim a po khawm hi.
Nimit gelhna: February 20, 1948
20th February, 1948
Tomlak kammalte kikalah deina: B.A., M.A., Ph.D.

Theih ding: Lai i khet ciangin husanna, ngaklang, tawpna, ngakna cih bang zawh ciangin laimal khatcia awng ding hi.

Ngaklang (;): Husanna sanga sawtzaw, tawpna sanga tomzaw kammal ciaptehna hi. Laigual guicing nih zopnaah kizang thei hi.
Sangkah na hanciam in; tua hi leh na mai vang ding hi.
Mi tampi in sum bawl hahkat hi; ahih hangin hau kim pah sam lo hi.

Tawpna (.) Laigual vuicing khat khawlna: Khat leh khat ki-it ni.
A seh genna: 5.5, 90. 75
Kammal tomlakna: M.A., M.Th., Tg., Rev., U.N.O. (Tu hun ciangin
tawpna khen se loin MA, MTh, Tg, Rev, UNO cih bangin zong kizang veve hi.)
Min maia kammal cingsa ah kizang lo hi: Lia Cing Lian, Upa Kham Tuang, Pu
Kam Hau

Ngakna (: ): Lai Siangtho phung leh tang deina - Luka 15:5, 1 Joh 1:2
Thu khat a kigelhna sungah mi dang kampau khat a kiguan ciangin tua
kampauteng pen a nuai gualah indent tawh gelh ding ciangin kizang thei hi.
Jesuh in mual tungah hih bangin gen hi:
“Kha thu lamah zawngkhal a kisate sungah…”
A kigelh thu khat, a kicingzaw-a ban gen ding ciangin kidei hi.
Hih vante: namsau, teipi, heipi, temta leh tu hong puak in.

Dotna (?) : Dotna a bawl laigual tawpnaah kizang hi -
Na dam uh hiam?
 Meh a al maw?
 Niangno hong pai tam?
 Hi mah lo diam, mate?
Kamdotna a bat hangin dotna a hi lo kampau pawlkhat om hi. Tuate ah zat ding hi lo hi.
Bang hangin kei tang dingin Jesuh si hiam ci-in ka lungngai hi.
Pasian in bang zah takin hong it hiam cih ngaihsun un.
Pasian hong itna bang zah lian hiam!
 (Hih munah Pasian itna a dong hi loin a lim gen nuam hi zaw hi.)
I gelh nop a hih hanga i tel phat lohte na en cian un cihna tawh kizang thei hi.
Thangpi pen Aung San sih kum (1947?)-a suak hi. (1947 mah maw 1948 zaw cih
tel lo hi. Ahi zongin hih kiimteng a hih ciangin hih banga i gelh teitei ciangin Thangpi
suah hun pawl ding kisansat thei tuam hi.)

Kamumna (“ ”): Mi khat peuh in thu a gen, lai a gelh khat ama gen bang, gelh bang
liana i gensawn, i gelh sawn ciangin tuateng ki-um hi.
Gandhi in, “Lai nei lo minam pen minam mangthang hi”, a ci hi.
Eima gen, eima gelh zong i gen sawn kik ciangin um ding hi.
Ke’n zong, “Lungdam lua, Mangpha beek na man in”, ka ci pah hi.
Lai gelhna sungah la thulu um ding hi.
Awn Khan Suan in, “Ka neu laiin lian leng lungnop ding kisa’ng” cih la a puak hi.
Magazin leh thukizakna sungah a kipuak thuluite i gelh kik ciangin um ding hi.
Sia Hau Go in, “Lai Thu” cih a gelh manpha ka sa hi.

Gitphei (--) : Kammal hon khat kalkak ciangin kizang thei hi.
A mangthang pah ding -- ngun leh kham, inn leh lo, puansilh nikten -- sangin
Pasian ukna bulbawl masak ding hi.

Thekna (-): Kammal sau khat taklam gual a tat loh cianga khenna hi.
Sanginnah min hong sap lai takin kei zong ka om nuam hi.
Zogam khuapite lakah Tedim mah nopsa pen ing.
Kammat kimat pawlkhat a kisim khialh khak ding i lunghihmawh ciangin kikhen hi.
Ki-itna mah thupi pen hi.
Kei kiangah ki-angtangsak lua kei un.
Nu Ciin Niang in, “Lawm aw,” ci-in hong sam hi.
Hun khat leh hun khat, mun khat leh mun khat, min khat leh min khat kikal
lahnain kizang thei hi.
October 2-5, 2000 sung Khuado pawi kibawl hi.
1939-1944 sungin Japan gal hong tung hi.
Aizawl-Delhi vanleng tuan man bang zah hiam?
Tedim-English-Hindi-Burmese kammalkhiatna ka bawl hi.

Tanglak (’): Laimal kimelh tangin kizang hi. -
Ka pa’n hong sam hi. (pa in )
Topa’n hong it hi. (Topa in )
Ut le’ng gamla lua lo hi. ( lehang)
Ba’m cih leh (Bang hang hiam), Ka’i ve. (Ka hi).
Neihsa lahnain kizang hi -
Hih pen Mungpu’ uino hi. Mungpu pen Thang Kham’ tapa hi.
Theih ding: Hih bang kam melhna pen Zopauah tampi i nei hi. Tuate khempeuh
tanglakna tawh ciapteh ding ci lehang tam lua ding hi. A kitelkhial thei dingte bekah
zathuai hi. Na hong pen nong, ka hong pen kong, ding hiam pen diam kici a, tanglakna
i zat loh hangin kitel thei veve hi.

Kual ( ): Kammal khat a deihna a kicianzaw, a kitelzaw-a gen beh ciangin kizang hi.
Mungpu (Thang Kham’ tapa) pen pil mahmah hi.
Sum tulsawmnga (Rs. 50,000/-) kong khak hi.
Zolai kammal khat minam dangte kammal tawh i lah kik nop ciangin kizang hi.
I gamah zato siamah (nurse) kisam hi.
Lai pilna (education) pen kideih ciat hi.
Gamvaihawmna (politics) mi kim in i tel ding thupi hi.
A kisam lopi-in nambat khat peuhpeuh kual pahpah ding hi lo hi.
Tutung ZBC khoppi mihing (50,000) pha hi. (50,000 kual loh ding)
Langno in (1960) kumin BA zo hi. (1960 kual lo ding)

Git-awn (/): ‘A hih kei leh’ cihna tangin kizang hi. - Khangnote in min mai ah Lia/Tang gelh hi.
Zum lai nambat ciaptehnain kizang hi. - ZCF/2004/10

Laibu: Laizat Tangzang.